梅萊媽發姣畀乖仔鬧！
近日英國天才梅萊嘅阿媽Judy，喺twitter不停大讚西班牙型男盧比斯又靚仔，打波又叻，表現「嗒晒糖」，搞到梅萊已經好冇面，喺男單8強戰前，梅萊「喝止」阿媽唔好再同佢嘅好友兼對手「調情」，等佢可以專心比賽。
好友兼「陪練」冤家路窄
唔知係咪天意弄人，梅萊喺8強戰要對盧比斯，梅萊賽前話：「我諗佢（阿媽）係時候要停止講廢話，實在令我覺得惡心！」今年50歲嘅Judy媽曾經大讚29歲嘅盧比斯係「神造的羅馬人」，仲喺twitter不停為盧比斯打氣，兩人更有交流，Judy媽曾以「Deliciano」（甜心、可愛）來形容盧比斯，睇呢個西班牙人比賽時又喺twitter寫上「我實在安定唔嚟」，被形容「發晒姣」。
查實梅萊同盧比斯私底下係好朋友，場外都會彼此作為訓練拍檔，就連梅萊都取笑阿媽對盧比斯「嗒糖」:「有次訓練我同盧比斯講，我阿媽讚你『靚仔』喎，想同你影張相，點知我阿媽面都紅埋，仲話No,No,No，拒絕合照，真有趣，媽咪平時都唔係咁嘅。」