Jamie選擇嘅一身橙白色配搭，整個視覺睇落好啱佢，完全配合佢健康嘅膚色，好舒服又搶眼，尤其係上身嘅橙色，係今年好興嘅顏色，反映佢好有潮流觸覺。不過，下身嘅白褲就有啲唔長唔短，比較尷尬，其實可以選擇再短一啲嘅長度，效果應該更好，睇起嚟會更清爽，同埋身形會更修長。至於橙色涼鞋睇嚟就好似求其咗一啲，如果配上厚踭涼鞋，就好睇得多喇。
我會建議Jamie多選擇鮮艷嘅顏色，襯佢一身健康嘅膚色，橙色、桃紅同青綠色都好啱佢，睇起嚟Sharp又清爽，下身可多着短身褲或者闊褲，好似牛仔裙褲都好啱佢。
至於冬天嘅皮褸Look，我覺得就比較「多咗」，而且黑色衫襯牛仔褲唔係太啱佢，特別係條牛仔褲都係唔長唔短，我覺得佢着黑色窄身褲可以凸顯佢更修長嘅身形。