最近有個老友嘅老婆有喜，佢就好恨生女嘅，晨咁早已想幫囡囡改名，佢話想個女將來喺體壇爆紅，又知道小記讀過吓書，就嚟問教！我諗咗一諗就話：「一字記之曰：娜！」皆因自上個世紀爆出個「體操天后」霍爾金娜之後，近呢幾年每隔幾個月就有位「娜姐」喺體壇爆紅，有個「娜」字一定冇衰！之後老友仲問如果生個仔呢？我就話「都係拿！」因為講波又有邊隊紅得過「巴塞隆拿」呢？
李娜喺年初嘅澳洲公開賽打入女單決賽已經為中國網球壇創造歷史，點知佢炒咗「老公教練」姜山魷魚之後仲勁，喺法國公開賽攞埋女單冠軍添，依家「娜姐」喺內地個名仲勁過姚明同劉翔，真係有排紅呀！
本身已係俄羅斯超索模特兒嘅伊蓮娜，原來同「最型男人」C朗一直「暗交」，兩人關係直到南非世界盃期間至被踢爆，令「娜姐」更加名震全球。加上當時又爆出有另一個女人幫C朗生咗個仔，緋聞炒得更勁，亦令「娜姐」喺「模界」紅上加紅！
乒乓球一直係香港體壇嘅「金礦」，09年香港主場搞東亞運，「娜姐」帖雅娜一口氣掃走混雙同女團金牌之餘，仲喺比賽期間同拍拖多年嘅男友唐鵬拉埋天窗，令全港市民都能夠分享佢成為「唐太」嘅喜悅，真係戥佢哋心甜。
香港飛魚「鬼妹仔」韋漢娜，雖曾出戰雅典奧運同北京奧運，但講到爆紅，就一定係09年暑假嘅世界大學生運動會，佢連奪100米自由泳同100米蝶泳兩面金牌，開創本地體壇重要一頁。
喺北京奧運前，何雯娜根本冇乜人識，直到佢幫中國攞到彈床金牌，加上可愛樣貌，至令呢位客家姑娘瞬間爆紅。不過，人紅就難免畀人起底，15歲時曾跟人私奔等醜事陸續爆出，好彩佢依家嘅男友、中國體操名將陳一冰一啲都唔介意啫！
塞爾維亞網球手伊雲娜域喺08年奪得法國公開賽冠軍，由於佢樣靚笑得甜，人氣直逼同年贏得澳洲公開賽冠軍嘅舒拉寶娃。但係「娜姐」經此一役掛住「瘟仔」，成績一落千丈，可惜！可惜！
除咗喺體壇嘅一班「娜姐」紅到發紫外，娛樂圈嘅「娜姐」就更犀利。最經典嘅「娜姐」當數形象百變嘅麥當娜，而香港亦有位經典「娜姐」，已故嘅「奇女子」狄娜，佢後生時賣到性感，息影後做生意又掂，連中國嘅人造衞星都關佢事，真係巴閉！
近期本港娛圈亦有兩位「娜姐」跑出，一位係來自大溪地嘅官恩娜，憑藉一首《Endless Love》紅遍全港，而另一位「娜姐」相信唔使多介紹，咪就係周秀娜囉！
據玄學家陳子才表示，「娜」字五行屬火，撞啱今年辛卯年屬金，當中火剋金，故名字中「娜」字嘅女運動員都特別醒神，喺比賽較易勝出，容易揚名立萬。而「娜」字可解拆為「女子手持利刃攻陷城池」，咁有氣勢，喺各項賽事梗係極為有利啦！
撰文：司徒子文、吳浩然