一直都知今屆中國奧運男足係史上最弱，但勢估唔到佢哋竟然咁快就完成倫敦奧運之旅，連分組賽都入唔到。作客阿曼輸波唔奇，但講到佢哋畀黑哨吹死就講唔通，因為內地聯賽正正就係最多黑哨嘅賽事之一，球員喺呢啲環境成長，試問魚點會怕水？
國奧輸波過程大家都知，至於嗰位伊朗球證吹成點，究竟係咪黑哨亦自有公論，但國奧職球員當場反應未免過激，例如你輕輕一碰阿曼球員就畀球證吹罰，但對方點犯規都冇事，呢啲判決好平常，唔值得大驚小怪。講到國奧補時入波被判詐胡，喺中超更屬家常便飯。
波唔夠人打而要搵個球證嚟洩憤，可以話係人之常情，不過只可以事後嘈，比賽期間千祈唔好躁。話分兩頭，西亞黑哨問題亦係死症，阿曼打波竟然搵個伊朗球證嚟吹，你話冇嘢都冇人信。
其實如果國奧認真啲踢，冇畀個球證搞興，加時頂到尾再博互射十二碼，阿曼亦唔會贏得咁輕鬆，睇番2000年黎巴嫩亞洲盃，日本喺決賽火併沙特阿拉伯，何嘗唔係畀對方又打又踢，日本都能沉着應戰，最後贏波捧盃，所以日本足球咁強盛，真係有原因架！
波男