【本報綜合報道】NBA國際化似乎已經係大勢所趨，今次選秀會前7位之中，唔計澳洲出生但自小於美國長大嘅狀元艾榮，仲有5人來自海外，可以話係選秀史上最國際化嘅一次，呢批海外兵團當中以探花簡達最受矚目。
年僅19歲嘅簡達，身高2米11，可打4號或5號位，佢上季因涉及違規招生，被NCAA賽會停賽1年，但仍然被爵士睇中，可見佢相當有實力。簡達表示依家相當渴望比賽：「我太期待重返球場，我會喺暑假代表土耳其國家隊征戰，希望可提升狀態。」身體強壯嘅簡達，打法硬朗，但由於佢嘅表現實在太成熟，令好多人對佢嘅真實年齡有所懷疑。
此外，排第4位嘅卓斯坦湯臣來自加拿大，第5嘅維蘭斯尼斯則係立陶宛人，加埋第6、7位嘅韋斯利及比約保，分別來自捷克及剛果民主共和國，選秀會頭7人之中，就有5人係海外球員。
至於新鮮出爐嘅NBA冠軍小牛，以首輪第26順位，交易到拓荒者射手費南迪斯，來自西班牙嘅費南迪斯，上季喺拓荒者雖然擔任後備，但表現突出，平均每場攞到8.6分，外投能力相當強，小牛上季已有魯域斯基、巴利亞及史杜積高域3名海外球員，依家再加埋費南迪斯，堪稱聯合國部隊。