今次國奧隊輸波出局，內地球評同球迷都認為球隊係敗於伊朗球證穆罕辛手上，原來呢位球證以往曾多次作出不利中國隊嘅判罰，一早被封為「中國剋星」，國奧隊遇到佢，只好嘆句倒楣。
早於○三年奧運外圍賽，中國作客一比三不敵敍利亞，當時執法球證就係穆罕辛。之後佢吹過○五年亞冠盃，連續趕鄭智及一位外援出場，山東魯能二比七大敗於伊蒂哈德腳下，人稱「吉達慘案」。
○八年東亞錦標賽中國雖然以三比一戰勝北韓，但穆罕辛共出示十二黃兩紅，中國隊員杜震宇及徐雲龍被逐。