中國隊在奧運外圍賽蒙冤出局，首回合輸○比一嘅國奧隊，周四晚作客阿曼進行倫敦奧運亞洲區外圍賽次圈次回合，雖一度追和，但其後國奧隊補時入波遭伊朗球證誤判詐胡，加時期間僅餘九人應戰下最終以一比三慘敗，兩回合以一比四見負，連分組賽都入唔到，錄得史上最差成績。
國奧隊於下半場六十九分鐘由吳曦取得入球，為球隊領先一比○，總比數扳平一比一，不過其後國奧隊遭受接二連三打擊，伊朗球證穆罕辛作出多次不利國奧判決，先有曹贇於七十二分鐘領紅牌被逐，完場前又指雷騰龍入球越位判詐胡，並將上前投訴嘅教練巴拉斯域趕上看台。
加時上半場國奧隊終被阿曼攻破大門，其後董學升受傷離場，國奧隊僅餘九人應戰，阿曼於加時下半場再入兩球，以三比一勝出，兩回合總比數四比一淘汰中國。
自從奧運男足於八八年開始將參賽年齡限制在廿三歲以下，國奧都在外圍賽分組賽出局，直至○八年才以東道主身份在北京奧運亮相，但今屆倫敦奧運連外圍賽分組賽都入唔到，創下國奧歷來最差成績。
國奧敗北後球員掩面哭泣，教練巴拉斯域賽後指執教生涯從未遇過這種球證，足管中心副主任于洪臣表示：「比賽結果非常遺憾，但國奧隊不會就球證問題向亞洲足協上訴，但會匯報比賽過程。」對於巴拉斯域去留，于洪臣指會按照合約規則處理，合約自動中止，而球隊亦結束歷史使命。