細威遭放逐金句還擊
成日都語出驚人嘅「細威」S威廉絲，又有新金句！呢位復出無耐嘅美國球手，日前喺溫網次圈贏波之後，就好無Mood咁向賽會投訴，話以佢今時今日嘅地位點解仲要「放逐」到二號場，而觀眾最多嘅主賽場就多數畀男球手打，直斥大會有性別歧視！這言論其後還獲得WTA官方及禾絲妮雅琪聲援呢！
「我假假哋都係冠軍……」
「細威」上場波刻意打扮，仲帶埋大量珠寶上身，都係為咗搶人氣，但點知畀賽會安排喺二號場比賽，令佢極之無癮：「我同家姐假假哋都算係贏得溫網單、雙打冠軍最多嘅球員之一，但竟然無得喺主賽場打波，點講都無道理！我打呢場波根本唔使熱身，因為老遠咁行去二號場打波就經已熱咗！」不過，賽會就解釋話分配場地係基於二十九種不同因素，而且二號場經已有四千座位，一啲都唔失禮。
喺呢場波仲有個小插曲，就係「細威」早前探望過嘅五歲腦癌病童，都有到場為佢打氣，真係夠晒溫情。