終極戒鹽身材包冇走樣
想擁有好似鄭麗莎咁Fit嘅身形，除咗勤做運動，飲食方面當然都要有所節制，其實Lisa偶然都會打邊爐同食大餐，不過健體賽事臨近，佢話一定要嚴格控制飲食，仲自製「女王餐單」，大約喺比賽前一個月開始實行。
日吞20隻蛋白
控制飲食唔一定係食少咗嘢，Lisa一直保持苗條身形，與食量嘅多寡關係不大，反而食物嘅種類就有規定，Lisa話：「我主要嘅食物係雞蛋，大約1日食20隻，每日食5餐，要訣係只食蛋白，唔食蛋黃。」
肉類方面，Lisa會親自主理清水煮雞或魚：「雞當然要去皮，唔加任何調味，雞肉煮熟之後再切成碎塊，每餐食少少。」
女王餐單當中亦包括罐頭食品，就係罐裝吞拿魚，Lisa話煮魚比較難處理，食罐頭比較方便；至於其他食物，佢話每日會食兩個水果，飯、麵同水只可能小量，賽前一星期完全禁止，而整份餐單嘅重點係禁食鹽，食得清淡啲，可確保身形唔走樣。
女王至Fit餐單
雞蛋（淨蛋白）20隻
雞肉（清水煮熟）半磅
罐頭吞拿魚2罐
水果2個
飯或麵小量（賽前一星期禁食）
水小量（賽前一星期禁飲用）
鹽禁食