鄭麗莎索爆Sunday

過去五年參賽都從未失手嘅Lisa，自去年十月奪得世界健體小姐榮譽後，隨即為全港錦標賽作準備，而今年為咗專注喺全港賽爭取「六連冠」，被迫放棄競逐同時間進行嘅華南賽。Lisa話：「今年嘅備戰比較多元化，特別喺肌肉上，不過時間上就比往年緊迫，因為早前要參加搶包山，但我對於備戰進度感到理想。」

衣着造型年年有驚喜

Lisa每年參賽都會為觀眾帶嚟連串驚喜，特別喺衣着造型上夠晒心思，盡量爭取評判分數，佢話今年亦不會例外：「我想畀觀眾一啲神秘感，所以唔想透露太多，呢個idea係我自己諗出嚟，跟住由設計師再加以發揮，大家一定會覺得好新鮮。」Lisa對於參賽造型非常保密，只肯透露「戰衣」以金色為主。

呢件「窩釘」戰衣就助Lisa奪得世界冠軍。

Lisa每逢出賽都要「索爆」亮相，化妝用品又怎能少！

講到Lisa嘅參賽「戰衣」，佢一直非常重視，而且每次比賽（包括本地及海外）都唔會重複，佢話：「每件戰衣我都會留為紀念，而自己最鍾意係參加世界賽嘅粉紅『窩釘』look，設計師為我諗出呢個造型充滿野性及型格，加上粉紅色又有女人味，所以世界賽一出場就博得全場掌聲。」喺Lisa衣櫃入面放滿參賽戰衣，包括四、五十套健美參賽服，以及約二十對高踭鞋，而在她記憶當中，07年亞洲賽奪季軍嘅戰衣，就足足花咗幾日時間先至完成，係最長時間完成嘅「戰衣」。

由於要配合不同造型，所以高踭鞋都有廿幾對。

Lisa在出賽戰衣中，這件「太陽花」算是代表作。

學生組打氣團撐場

本周日再度踏足灣仔伊館，係Lisa奪世界冠軍後首次在香港觀眾面前亮相，佢話自己有多少壓力，事關好多朋友都話會嚟支持，而佢喺城市大學及香港專業進修學院所教導嘅學生，更會組成打氣團撐場，令佢更想有好表現：「學校嘅老師及學生都話會嚟捧場，大家知道我攞咗世界冠軍後，都好想現場睇吓我嘅表現，心情確實有啲壓力，希望唔會令佢哋失望。」屆時健體小姐競逐將分兩部分進行，包括比堅尼及一件頭泳衣項目，參賽者要於兩部分進行三個自選及四個規定動作，讓裁判評分。