兩隊其實喺三月交過手，當時兩隊應邀去西班牙參加一項四角賽，結果美國Ｕ23以三比二擊敗挪威Ｕ23，最終更以二勝一和佳績奪得冠軍，事隔幾個月兩隊再應邀到瑞典踢友賽，相信美國呢支超班馬可以再贏多鋪！
美國甜姐兒射術精
呢支美國女足Ｕ23可謂身經百戰，共有八名球員踢過世青或世少盃，被視為美國女足接班人，當中最出位嘅首推二十一歲嘅前鋒梅利莎軒達臣，呢位甜姐兒喺今年已替美國Ｕ23射入咗五球，至於挪威女足Ｕ23啱啱喺周四凌晨同瑞典Ｕ23踢咗一場熱身賽，最終以五比二取勝，證明呢隊波攻力亦唔差，相信今仗會係一場多入球嘅賽事。