今季ＮＢＡ曲終人散，好彩暑假仲有女籃ＷＮＢＡ撐場，明早直播鳳凰城水星主場對聖安東尼奧銀星。《環球衞星》帶大家去到美國，睇吓呢場ＷＮＢＡ大戰有乜睇頭。（有線165台周六早上10時直播）
ＷＮＢＡ共有十二支球隊，東、西岸各六隊，今個月初開鑼，打到十月就會結束，啱啱頂替咗ＮＢＡ暑假休季嘅檔期，依家每隊只係打咗幾場，西岸嘅銀星可謂一枝獨秀，三戰三勝排緊頭位，係聯盟唯一不敗球隊。
銀星季初表現令好多人驚喜，因為普遍人認為今屆奪標大熱係西雅圖暴風，另外洛杉磯火花亦可爭一日之長短，反而銀星只被視為中下游球隊，所以季初彈出令人頗為意外。
睇番銀星陣中最具名氣嘅球員，係俄羅斯靚女控衞漢文，呢位美國出生嘅俄羅斯人，雖然已經三十四歲，但依然相當索，仲係馬刺球星柏加緋聞女友，而且球技仲寶刀未老，佢由○三年開始，連續七年入選ＷＮＢＡ明星隊，打法相當全面。至於主場嘅水星，係○七至○九年ＷＮＢＡ總冠軍，雖然季初成績麻麻，頭兩仗全部輸晒，但對手係實力強勁嘅火花同埋暴風，今仗對住銀星絕對有能力反彈，該隊頭號球星係泰娜斯，曾奪得○九年常規賽及總決賽雙料ＭＶＰ，仲難得近兩仗手感返晒嚟添！