小牛明晨Game 4搏老命
昨日ＮＢＡ總決賽第三回合，熱火作客險勝小牛88比86，總比數領先2比1。熱火呢場勝仗可謂非常關鍵，因為自1985年總決賽改制為主客「2-3-2」後，如果前兩場打成1比1，贏到第三場嗰隊最終都會成為總冠軍，奪冠率為100%，明早上演嘅第四回合，小牛主場只能背水一戰望翻身！（高清翡翠台、now 635及有線165台周三早上9時直播）
熱火今場本來可以贏得好輕鬆，佢哋喺上半場一度領先14分，諗住控制大局之際，點知換邊後小牛喺球迷嘅吶喊助威下愈戰愈勇，將比分拉得好近，全靠熱火主將保殊臨危不亂，喺完場前39秒射入關鍵入球，最終助熱火以兩分險勝。
保殊完場前39秒絕殺
小牛主將魯域斯基今場表現相當突出，全場取得34分及11個籃板，單係最後一節就攞咗15分，可惜喺小牛嘅最後一擊，佢轉身投籃「炒粉」，就係呢次投射，隨時令小牛失去總冠軍！
自85年總決賽改制後，總共出現過十一次打和1比1，能夠贏到第三場嗰隊，最終都成為冠軍，當中包括去年嘅湖人。雖然熱火現在奪冠形勢大好，但教練史普斯達卻指上述統計係一派胡言：「數據係死嘅，紀錄係畀人打破嘅，每一場比賽都係獨立嘅賽事，最緊要係打好下一場波。」
本報綜合報道