喺ＮＢＡ總決賽開打前，勒邦占士被視為總決賽ＭＶＰ大熱門，但「大帝」打來全無霸氣，最後關頭都係靠隊友「閃電俠」韋迪搶分，難怪好多球評家都認為，若熱火最終成為冠軍嘅話，「閃電俠」極大機會攞埋ＭＶＰ。
熱火第二回合畀小牛反勝後，最後一節啞火嘅勒邦占士已承受極大壓力，雖然佢賽前揚言，成個聯盟之中，冇人可以單對單守得住佢，但今場面對馬利安嘅出色防守，「大帝」顯得束手無策，14投僅6中得17分，表現仲差過上場。
通常熱火最後幾次攻勢，都會交個波畀勒邦占士，但佢今場最後三次進攻，一次雙運球違例、一次被封阻，成個第四節僅得兩分進帳，表現令人失望，若非「閃電俠」發揮水準，熱火已經輸咗。
事實上，韋迪喺總決賽嘅表現相當平穩，今場除咗攞咗29分，仲搶到全隊最多嘅11個籃板，以佢嘅身高搶到咁多籃板，可想而知佢係幾咁勤力。目前大部分嘅美國傳媒，都睇好韋迪可奪得ＭＶＰ，因為佢嘅心理質素，同埋處理關鍵球嘅能力，遠遠超過勒邦占士。