德國槍復仇有火
Game3定輸贏！自從NBA總決賽在1985年改成主客「2-3-2」賽制後，近26年總決賽有11次出現今季情況，經過兩場賽事後打成1比1平手。翻查數據，原來呢11次只要贏出Game3者，最終就會登上總冠軍寶座！難怪小牛「德國槍」魯域斯基都話今場主場對熱火係全季最關鍵一戰。 （高清翡翠台、無綫明珠台、now 635及有線165台周一早上8時直播）
NBA總決賽在85年改制，由「2-2-1-1-1」賽制改成「2-3-2」，目的係減低擁有主場之利一方嘅優勢，令賽事變得更為刺激。唔經唔覺呢個賽制已進行到第27季，對上26季就有11次在前兩場打成1比1，奇怪係呢11次嘅總決賽，只要贏出Game3就能順利捧走總冠軍，無一例外，堪稱Game3定輸贏！
如此關鍵一戰，魯域斯基賽前就呼籲球隊要撇開06年陰霾：「我知道Game3係最關鍵一戰，06年總決賽對熱火就係因為輸咗Game3而失去總冠軍，呢個傷痛一直困擾我同泰利，我唔會畀噩夢再度重演。」至於教練卡素爾亦對奪冠充滿信心：「總冠軍球隊往往能夠做出一啲不可思議嘅事，我哋今季已經試過多次逆轉，我相信小牛能捧走總冠軍。」
騎士粉絲撐小牛
事實上，當小牛在Game2追成1比1之後，唔少球迷都鋤強扶弱，支持呢支達拉斯球隊贏得總冠軍，當中包括一眾騎士球迷。為了報復勒邦占士背叛佢哋，騎士迷近日喺網上發起一個名為CavsforMavs（騎士支持小牛）嘅活動，希望用網民凝聚「念力」，助小牛擊敗熱火，此外騎士球迷仲自製打氣tee撐小牛。
本報綜合報道