又大逆轉！小牛滅火追和1:1

「後上王」果然名不虛傳，小牛尋日在總決賽Game 2第4節一度落後15分之多，但最後6分多鐘打出一段22比5攻勢，結果反勝熱火95比93，場數追成1比1。小牛第六人泰利賽後就話，係勒邦占士同韋迪以為贏梗提早慶祝，因而激起佢哋嘅鬥志而完成驚天逆轉。

在西岸決賽已多次逆轉贏波嘅小牛，尋日又一次展示後上威力，熱火在第4節剩餘7分多鐘時，憑韋迪嘅三分球，將領先優勢擴大至15分，此時勒邦占士與韋迪已在小牛板櫈面前相撞慶祝，諗住今場都冇甩拖，殊不知噩夢至開始。

小牛嘅泰利同傑特相繼得分後追貼比分，而關鍵時刻就輪到魯域斯基出手，佢先替小牛追平，繼而射入一記三分球助球隊反先，雖然查馬斯立刻回敬一記三分，但「德國槍」在最後時刻單挑保殊上籃得分，助球隊贏出比賽。

「噴射機」泰利賽後道出逆轉原因：「第4節曾落後15分，當時對手就在我哋面前熱烈慶祝，無疑激發起球隊嘅鬥志！我哋對雷霆時曾經落後15分後做出大逆轉，所以今次亦冇放棄。」不過「大帝」與韋迪就否認有提早慶祝。至於保殊則承認錯誤，指自己在關鍵時刻守唔住魯域斯基。

Game 1弄傷手指嘅「德國槍」，命中率略受影響，今場22次起手僅中10球得24分，幸在關鍵時刻交到貨，小牛最後9分全由魯域斯基取得。至於韋迪今場攻入全場最高36分，而「大帝」就僅入20分，總決賽Game 3將於周一早上8時在小牛主場舉行。