熱火群雄 防槍捉小牛

毫無疑問，防守魯域斯基肯定係熱火總決賽前最大課題，事關「德國槍」在季後賽鹹魚翻生，拓荒者冇力招架、湖人「雙塔」遭其一人瓦解，而雷霆伊巴卡更加慘成魯域斯基飆分嘅最佳配角，一向被指內線積弱嘅熱火，將會遇上今季最大難關。

熱火教練史普斯達賽前透露，好可能以「車輪戰」防守「德國槍」：「魯域斯基係一個射波準而又懂得突破嘅大前鋒，佢可以用不同方法去得分，面對如此偉大嘅球員，惟有準備多套方案，用不同球員去限制佢。」不過史帥對己隊球員亦充滿信心，尤其係保殊及勒邦占士，佢更大讚「大帝」先係聯盟中最佳防守球員。

「大帝」防守勁過搶分

事實上，「大帝」在防守上嘅貢獻，可謂遠勝進攻，今季季後賽均被史普斯達委派去凍結對方主力，但占士都能一一完成任務，尤其東岸決賽嘜到常規賽MVP戴歷羅斯一戙都冇，的確係晉級最大功臣。除勒邦占士及保殊外，預計祖爾安東尼及夏士林在總決賽都要幫手防守「德國槍」。

小牛在06年總決賽領先兩場下遭熱火逆轉奪冠，從此視對方為仇敵。或許因為懷有一顆復仇心，小牛在往後對賽從未失威，近10次對賽小牛全勝熱火，亦代表「三巨頭」成立以來，從未贏過「德國槍」。

本報綜合報道