古班家境普通，佢細個為咗買一對昂貴嘅籃球鞋，十二歲就開始做童工兼職，賣垃圾袋賺錢，可能正因為咁，佢自小已經好有生意頭腦，細細個已經識靠炒賣郵票賺錢，另外喺求學期間，亦做過酒保，同埋喺的士高工作搵外快。
科網泡沫爆破前早甩身
古班鍾意做生意，所以大學係讀工商管理，畢業第一份工又係做酒保，之後就轉咗做推銷員，呢個係佢人生嘅轉捩點，由於古班口才了得，加上推銷嘅電腦產品大賣，令佢掘到第一桶金。
儲咗一筆錢嘅古班，即刻開舖頭做老細，主打電腦軟件，由於八、九十年代資訊科技發展一日千里，古班嘅身家水漲船高，佢更成功係九九年科網泡沫未爆破前，出售咗佢嘅公司，令佢嘅身家再翻幾番。