古班為奪總冠軍轉性

古班千禧年以2.8億美元收購小牛，多年來不斷投資，將小牛由一支魚腩部隊打造成西岸勁旅，但佢最令人佩服嘅地方唔係使得多錢，而係每場落力地打氣，睇得七情上面，仲緊張過班球員同教練。

被聯盟罰款累積1326萬

十一年以來，古班出位嘅事迹多籮籮，佢曾經喺愚人節請臨記扮球證，愚弄教練令球迷啼笑皆非，亦曾經因為得罪賣雪糕嘅服務員，而要走到雪糕店賣雪糕一天，佢得罪人多、稱呼人少，被聯盟累積罰款高達170萬美元（約1,326萬港元），但佢率直嘅性格，亦得到好多人欣賞。

古班表示：「我係一個超級球迷，搞波係為咗樂趣，所以我會以球迷嘅觀點出發，我向聯盟提出好多意見，雖然佢哋有時覺得我搞事，但亦有部分建議獲得接納。」

不過，自從喺今季季後賽展開後，古班突然沉靜起來，莫非佢知道「沉默是金」嘅道理？小牛教練卡素爾表示：「古班係我見過最聰明嘅人，佢做所有嘢都有佢嘅原因，但我可以話佢真係非常着緊球隊，而且好在意奪得總冠軍，全隊上下都希望將總冠軍送畀佢！」