小牛客勝雷霆領先2:1
NＢＡ西岸決賽第3回合，小牛憑老將傑特精湛演出，作客以93比87擊敗雷霆，總比數領先2比1，晉級總決賽形勢大好，因為根據季後賽歷史，若前兩場打和1比1，能夠贏到第3場嘅球隊，晉級機會率高達７成，兩隊將於香港時間周二早上進行第4回合較量。（now 635周二早上9時直播）
魯域斯基感激隊友
小牛今仗贏波功臣係38歲老將傑特，佢面對比自己年輕15歲嘅對手韋斯布克全無懼色，全場取得13分、6個籃板球、8次助攻同4次偷波，表現可用技驚四座嚟形容。反而早前表現出色嘅「德國槍」魯域斯基，今場表現就略為失準，21投7中僅得18分，幸好傑特喺關鍵時刻帶領球隊沉着應戰，防守、助攻同得分瓣瓣有，光芒完全蓋過對手。
布沙作客心掛掛
魯域斯基亦大讚呢位好拍檔：「今場我發揮一般，但隊友仍好相信我，繼續傳波畀我，傑特喺季後賽一直發揮水準，我對佢今日表現唔感到驚訝，事實上今日每人表現都好稱職，下仗雷霆一定會進行大反擊，我哋必須咬緊牙關，贏埋下一場。」
另一邊廂，東岸決賽公牛對熱火進行得如火如荼，公牛主將布沙卻另有牽掛，因為佢妻子同３個兒子依家都係住喺邁阿密，佢希望趁作客期間探望自己患病嘅兒子。
布沙囝囝卡曼尼出生就患有貧血病，幸好經布沙夫婦悉心照顧下，病情好轉，布沙亦成立咗「布沙夥伴基金」，幫助其他受此疾病困擾嘅家庭同小朋友。布沙表示：「我家人都會前來球場為我打氣，我個仔依家身體好健康，但我要注意佢嘅病情唔會復發，我希望日後可抽到更多時間陪佢。」
本報綜合報道