東盟早前喺印尼雅加達峰會提出，由東南亞十國聯合申辦2030年世盃決賽周，仲會組成一支「十國聯軍」以東道主身份大堆頭出擊，東盟呢個構想確係夠晒天馬行空，但係呢個世界冇嘢係冇可能，卡塔爾個「冷氣球場」都得，「十國聯軍」點解唔得？
東盟十國總人口高達六億，峰會除咗政治、軍事同經濟議題，仲有講體育，例如兩年一度嘅東南亞運動會同東南亞足球錦標賽。東盟十國體育水準雖然唔高，但體育風氣相當盛行，○七年其中四國就曾合辦亞洲盃決賽周。
國際足協已經試過喺○二年由南韓同日本合辦世盃決賽周，其實佢哋好鍾意試新嘢，包括去年首次喺非洲搞世盃，又拍板十一年後喺西亞嘅卡塔爾整番個沙漠世界盃，雖則因為賄賂風波依家搞到一鑊泡，但東盟嘅建議咁出位，一般人覺得荒唐無聊，卻可能啱晒國際足協胃口喎！
講到足球實力，東南亞球隊又確實唔係好掂，不過佢哋個「十國聯軍」構思就夠晒噱頭，試想吓東道主十一個球員落場，個個唔同國籍咁滯，贏輸另一回事，淨係收視率都已經贏晒啦！
波男