甲組會議早前建議，下季聯賽升降制由現時嘅「升二降二」改為「升四降二」，配合再後一季新成立嘅職業聯賽可以有十二隊咁話，但港甲環境大家唔係唔知，缺人缺水缺場地，下季乙組竟然有四個升班名額咁多，莫非新職業聯賽有金執乎？
其實港甲升降制度一直有等如冇，皆因波總並冇硬性規定乙組冠亞軍一定要升，如果乙組隊唔升，甲組降班球隊就有機會獲足總挽留，此漏洞源於乙組只係業餘球會，而上甲組就要搞職業，兩者喺人腳同銀碼都係兩個天地，好難銜接。
根據波總「鳳凰計劃」建議，新職業聯賽門檻甚高，入場費要幾百萬，要全職業又要搞梯隊，仲要搞埋包裝推廣同搵贊助，莫講話下季升班嘅四支乙組隊，依家幾支甲組隊都眉頭皺。
仲有一個問題，就係本地球員數量太少，球員唔係石頭爆出嚟，係要時間去培訓，有人計過數，今季十隊甲組，唔計業餘嘅港會，九隊波除去每隊四個外援，正選上陣嘅本地球員加埋共六十三人，由於下季港會已降班，變成十支職業隊，所以下季要增援解決球員不足問題，至於再下一季四支乙組一齊升班，分分鐘要搵埋和仔、度士、阿倫復出湊夠人腳至掂！
至於新職業聯賽點吸引乙組隊升班，甲組會議就冇討論，其實講到尾都係錢銀最緊要，如果升班有錢派，大把球隊爭住升啦！
波男