大帝內地吸金暴增312億
東岸決賽第三回合，熱火主場對公牛，香港時間周一早上上演。今季季後賽緊張刺激，美國收視率比去年增加三分之一，難怪「大帝」勒邦占士被指為史上最賺錢嘅NBA球員。內地傳媒估計，若「大帝」奪得總冠軍，其贊助商在中國嘅收益將增加40億美元（約312億港元）！ （now 635、有 線62及165台周一早上8時30分直播）
根據調查顯示，今年通過美國有線電視收睇首輪季後賽嘅球迷，比去年增加31%，次圈收視率亦增加28%，東岸決賽更創下美國有線電視轉播NBA嘅收視紀錄，舊紀錄係2003年米高佐敦打嘅最後一場明星賽。
勒邦占士嘅威力唔只喺美國，而係全球性，內地傳媒指占士喺中國嘅商業價值早已超越高比拜仁，如果「大帝」能夠帶領熱火奪得總冠軍，佢嘅贊助商喺中國嘅收益可增加40億美元，都咪話唔誇張。
明鬥公牛韋迪紮住上陣
講番場波，上仗右臂受傷嘅熱火主將韋迪，賽前話傷勢無礙，今仗可上陣鬥公牛：「我只係輕傷，並冇縫針，操練戴上保護套只係為穩陣起見。」。
公牛上仗輸波被追成1比1平手後放咗一日假，戴歷羅斯指唔可以重蹈上仗覆轍：「今仗除要增加投籃命中率外，亦要加強反擊，呢場如果我哋再輸，將承受極大嘅壓力。」