又失頭籤木狼轟有黑幕！

魯域斯基48分助小牛霹「雷」

木狼近季成績一直低沉，連續七季未能打入季後賽，而「狼王」加納特在07年離隊後，木狼更淪為魚腩，近四季得勝率不足三成，照計係大有機會抽得狀元籤。可惜木狼就係欠缺抽籤命，近四季都抽唔中頭籤，因而失去戴歷羅斯及比力克格芬兩位超級新秀，羅斯今季已令公牛成為常規賽一哥。

木狼總經理簡尼賽後怒斥，抽籤會早已有晒劇本：「聯盟往往喜歡製造煽情故事，上季就係巫師已故班主普連遺孀抽中頭籤，今季就係患病嘅歷克基拔企喺台上，當時我就已同爵士總經理講，我哋今鋪輸梗，果然係騎士抽得狀元籤！」不過揀得早亦未必好嘅，因為史上好多超級球星都唔係狀元爺，包括兩代「波神」標羅素及米高佐敦。

賽事方面，小牛憑魯域斯基瘋狂地轟入48分，以121比112擊敗雷霆，在西岸決賽先拔頭籌。魯域斯基今場24次射罰球全中，創出季後賽紀錄。