騎士靠黑仔太子中狀元

騎士球迷終於可以忘記「叛徒」勒邦占士,因為球隊已找到新英雄,就係班主基拔嘅兒子歷克基拔!「小基拔」比任何人都要「黑仔」,事關佢患有先天性神經纖維瘤,一出世就要同「死神」搏鬥,但如今佢卻成為最幸運嘅人,歷克在只有2.8%極微機會率下,協助騎士抽中今季選秀會狀元籤,成為全晚大贏家!

騎士班主基拔在今季選秀抽籤會上一反傳統,未有照慣例派出球員或職員抽籤,反而委任年僅14歲嘅兒子歷克基拔「出戰」。不過歷克卻非有運之人,皆因佢患有先天性神經纖維瘤,自出世後就要飽受手術及化療痛苦,其中一隻眼更早失去視力,未來日子仍要同「死神」角力。

小基拔生瘤搏鬥死神

不過最倒楣嘅人,在選秀抽籤會卻成最幸運嘅人!騎士在今季擁有兩個首輪選秀權,一個係自己嘅籤,而另一個就係季中用莫威廉士從快艇換來嘅籤,但後者只得2.8%機會率抽中狀元籤。勢估唔到,騎士就係憑歷克之手,用快艇換來嘅選秀權,擊敗機會率高達25%嘅木狼而抽中狀元籤,而另一支籤就抽中第4位選秀。

騎士成為抽籤會大贏家,基拔興奮之餘,亦不忘感謝兒子:「我要感謝歷克,佢從來冇抱怨過如此痛苦嘅命運,係我見過最樂觀及積極嘅人,我早已視佢為英雄,我希望所有人都好似佢一樣,積極地面對人生!」

今次係騎士史上第4次抽中狀元籤,據悉佢哋好大機會揀選杜克大學嘅控衞歐文(Kyrie Irving)來重建球隊,並視佢為騎士「新大帝」。