NBA下季冇得玩？
ＮＢＡ季後賽進行得如火如荼，而另邊廂勞資雙方亦作了正面交鋒！以ＮＢＡ總裁史端為首嘅資方，上周提交了一份新方案給球員工會，條件卻是極度苛刻，因資方打算將工資帽大幅下調25％，降至4,500萬美元（約3.5億港元），另外還引入硬性工資帽制度，令勞方非常不滿，睇嚟ＮＢＡ下季有可能開波無期！
一年蝕３億諗計節流
由於ＮＢＡ近年不斷虧蝕，聯盟在上年度就足足蝕了3億美元，老闆們叫苦連天，於是急謀「節流」，誓向球員薪酬開刀！據多個美傳媒透露，資方在最新方案中要求每支球隊嘅工資帽（球員工資總和）縮水25％，即係由目前5,800萬美元（約4.5億港元）大幅減至4,500萬美元（約3.5億港元）。另外仲會引入硬性工資帽，直接影響球員薪酬，屆時所有特例都會取消，新秀合同與頂薪球員等合約都不能超越硬性工資帽，預計聯盟可將總薪酬支出控制在8億美元左右。
工資帽下調，亦代表球員薪酬將會大減，湖人老將費沙就新方案怒斥資方根本毫無誠意談判。至於球員工會執行董事比利亨特就表示，若然真係按照呢個方案進行，唔單只球員利益受損，整個聯盟嘅體系都會改變。
湖人支薪7.1億爆晒額
以上季為例，僅得6支球隊未有超過工資帽上限，其中湖人總薪酬更高達9,160萬美元（約7.1億港元），如今要將工資帽降至4,500萬美元，即意味要「紫金兵團」一係人人支半薪，一係就Cut一半人手！
由於資方要求苛刻，而勞方則希望維持現狀，雙方談判正陷入僵局，所以費沙已經發了公開信給所有ＮＢＡ球員，叫佢哋為ＮＢＡ停辦作好準備，似乎ＮＢＡ下季的確好大機會開唔成波。
本報綜合報道