戴歷羅斯一個打晒好易殘
戴歷羅斯「牛氣沖天」！今季常規賽MVP戴歷羅斯昨日再有神級演出，喺最後一節獨取11分，帶領公牛以95比83擊敗鷹隊，總比數領先3比2，香港時間周五早上將作客鷹隊，贏波便可打入東岸決賽。（廣東體育周五早上8時直播）
公牛今仗贏波功臣一定係戴歷羅斯，佢全場取得33分及9次助攻，包括喺最後一節嘅關鍵時刻，挺身而出攞咗11分，憑一己之力擊潰鷹隊。戴歷羅斯喺今個系列賽平均得32分及9.2個助攻，可以話擔起晒成隊波。
不過，戴歷羅斯嘅爆發亦反映出隊友嘅不濟，尤其今季加盟嘅大前鋒布沙，季後賽演出令人失望，今場11投4中僅得11分，打法柔弱得被批評似女人，令戴歷羅斯場場都打得非常吃力。
冇「柏賓」場場要打足
雖然戴歷羅斯被譽為「波神第二」，有力帶領公牛重建王朝，可惜佢身邊冇一位「柏賓」幫手，以戴歷羅斯季後賽幾乎場場打足嘅情況睇，即使過到鷹隊呢關，東岸決賽亦不樂觀。
公牛教練泰保杜亦話：「我哋需要每個人都作出貢獻，咁先有機會爭取冠軍，好似今仗後備泰查吉遜嘅表現就非常好，我哋必須減輕戴歷羅斯嘅負擔，因為佢嘅腳傷未完全康復。」