世界盃亞洲區外圍賽三月尾已經抽咗籤，香港嘅對手係沙特阿拉伯，港隊喺七月廿三日先作客，七月廿八日主場，傑志喺聯賽奪冠當晚更表明會以港隊為重，傑志兵任選，得到冠軍球會力撐波總打世界盃，大家個心都定啲。
自從「招積」三月尾離任，港隊主教練一職懸空至今，波總話正委託獵頭公司招聘港隊教練，咁嘅辦事效率未免過分滋油，搵得教練嚟個賽事都踢完，今次世界盃應該係特事特辦。
港隊去年實施每周一課長期集訓，可惜出席率甚低，部分球員只到不操甚至唔到，其後更不幸地遭甲組會叫停，依家聯賽差唔多埋尾，亞協盃亦告一段落，甲組會再冇藉口阻止港隊組軍同練波。由依家到決戰沙特仲有兩個幾月，波總除咗六月約咗馬來西亞友賽之外，應該會再約戰幾隊西亞球隊作熱身，甚至拉隊出外集訓。
諗番上屆世界盃外圍賽港隊嘅遭遇，波總至今尚未釋懷，當時港隊仲係由「黎祥」率領，作客土庫曼由於住宿安排不當，搞到球隊幾乎要瞓街，港隊最終亦輸波出局。
波總今次有咁多時間，仲得到傑志派兵支持，依家要做嘅就係快啲落實人選，事關球季完咗球員各散東西，唔會企喺度等你慢慢選，去旅行嘅去旅行，入籍外援同國援都會返祖家，所以波總係搵人就要快手，球員想踢又好唔想踢又好，大家都有個預算。