相信賽前冇人估得到，繼頭號種子馬刺之後，西岸次名湖人亦意外地遭小牛橫掃，今季嘅西岸一、二哥竟全部入唔到分岸決賽。在九十年代公牛王朝之後，奪總冠軍次數最多就要數馬刺同湖人，如今兩大王者倒下，意味ＮＢＡ會改朝換代。
自從米高佐敦離開公牛之後，馬刺同湖人就接替公牛王朝，成為近十多年冠軍大戶，馬刺贏咗四季，湖人就贏五季，但正所謂歲月催人，兩位領袖鄧肯同高比拜仁都已經由小伙子成為三十幾歲老將，而普波維治同「禪師」積遜更加滿頭白髮，兩大王朝難免已走到盡頭。
其實單睇今季公牛嘅崛起，灰熊在季後賽嘅驚喜表現，可知現今ＮＢＡ講求速度及活力，而年輕就係最大本錢，馬刺、湖人確實唔應該再眷戀昔日嘅成功，應該盡早重組，成為下一支公牛。