BEAT LA人人讚好！
在小牛陣中亦有兩大「湖人苦主」，最受害嘅必數今場投入6球三分球，下個月就34歲嘅史杜積高域。呢位三分射手在98年加盟帝王，與韋伯、狄華克及積遜威廉士等組成NBA新興勢力，可惜從99年季後賽開始，帝王連續三季季後賽都遭湖人淘汰出局，「紫金兵團」自然成為史杜積高域嘅永恒仇敵。
至於另一位苦主就係老將傑特，38歲嘅傑特在02年轉投籃網後，隨即協助球隊打入總決賽，可惜當時就碰上由「禪師」及高比拜仁領軍嘅湖人，結果恥辱性遭湖人橫掃。傑特今場賽後亦承認，生涯上多次面對湖人及積遜都係輸多贏少，今次能夠橫掃佢哋，真係乜仇都報晒！