湖人王朝瓦解

小牛尋日打出瘋狂一仗，單係三分球已令湖人透不過氣，「噴射機」泰利後備入替10次起手中9球，成功平咗雷阿倫等球員嘅季後賽單場入最多三分球紀錄，另一後備兵史杜積高域則6射6中，佢同泰利合共投入15球三分波。而小牛全場共入20球三分，追平超音速在96年所創嘅季後賽單場命中最多三分球紀錄。湖人面對小牛「三分雨」毫無招架之力，結果在Game4慘敗36分，遭橫掃出局之餘，奧當仲輸埋品，蓄意犯規被罰離場。

積遜恥辱性收山 柏賓不忍

湖人未能如願再奪三連霸，曾領「紫金兵團」五奪總冠軍嘅「禪師」積遜，在賽後記者會確認今場係佢執教湖人嘅最後一仗。積遜在1989年被公牛提升為主教練，22年執教生涯間，從未試過在季後賽被對手橫掃，估唔到最終卻遭橫掃來結束執教生涯，難怪連「弟子」柏賓都話，唔忍心恩師以這種方法離開。

小牛掃走湖人，老闆古班（右）開心到震。（美聯社圖片）	湖人對小牛嘅Game4節節敗退，高比仔「冇眼睇」！（美聯社圖片）	放大圖片

老化嚴重 勢大換血

湖人出局、「禪師」離隊，正式代表湖人王朝瓦解，今夏亦好可能大換血重組。事實上，湖人主力已逐漸老化，除拜林之外，其餘四名主力加上第六人奧當均已達「三字頭」，其中高比仔退化嚴重，已缺乏「神力」去扭轉局勢。此外，加素在今季季後賽嚴重失準，更盛傳因失戀而同高比仔不和，西班牙天王或會因此成為湖人嘅重組籌碼，今夏被換走。