高比仔加素繼續「唔妥」 湖人再輸形勢危殆
衞冕冠軍湖人在西岸4強戰再輸一場，喺Game3以92比98不敵小牛，總場數落後至0比3，宣布由「危急」轉為「危殆」。禍不單行，兩大主將高比拜仁同加素更喺危急關頭傳出不和，據悉因為高比太太雲妮莎涉嫌教唆Silvia與加素分手，令後者嬲晒高比仔全家。
0:3翻盤冇績可尋
湖人今仗就如複製前兩場嘅錯誤，喺第4節嚴重失準，被小牛在尾段成功反先，小牛只要再贏一仗，就能夠淘汰仇人湖人出局。其實小牛領先3比0，基本上已經判咗對方死刑，事關NBA歷史上，從未有球隊能夠在落後0比3下創造奇迹出線，更何況湖人此前曾經有過8次落後0比3嘅經驗，不但未能翻盤，呢8次更加連第4場都全數輸埋，遭對手直落4場橫掃出局。
已被湖人球迷視為頭號罪人嘅加素，表現依然冇起色，守唔住魯域斯基，畀「德國槍」攻入全場最高32分之餘，加素今場亦只係僅得12分進帳，難怪「禪師」積遜終於忍無可忍，今場曾在暫停時候，無視鏡頭拉住加素勁炳一番！至於領袖高比拜仁今場同樣冇料到，雖然佢攻入17分後，以5,263分力壓奧尼爾升上史上季後賽得分榜第3位，但今場喺關鍵時刻，呢位球星則繼續冇影。
高比老婆教唆分手
加素同高比仔一齊低迷，有傳係因為兩人不和，互不瞅睬搞到冇晒默契！由於加素兩周前被女友Silvia飛甩，令佢大受打擊。據美傳媒《mediatakeout.com》指出，原來Silvia之所以同加素分手，係受到湖人一名隊友嘅太太教唆，而外界估計此人正係高比太雲妮莎，因為佢同Silvia一向friend底，最有機會同資格做呢樣嘢。
有指加素得悉始末後，已經立刻同該隊友嘈起上嚟，而且冇晒偈傾！若果事件主角真係高比仔，睇怕湖人打埋周一凌晨嘅Game4，都可以提早收咧嘞！
同日另一場比賽，常規賽一哥公牛就冇再失威，憑新科常規賽MVP戴歷羅斯轟入個人季後賽新高44分，以99比82輕鬆擊敗鷹隊，場數領先2比1。公牛今場可謂完全打羅斯仔一個，佢交出華麗數據44分、7次助攻同5籃板球，而3分波更係7射4中，表現無懈可擊！
本報綜合報道