世上只有媽媽好！而每一位體壇超級明星背後，都會有段唔同嘅成長故事，佢哋有今日嘅成就，當中唔少都同媽媽有好大關連，當今體壇有唔少「星媽」隨着兒女「當紅」，亦有啲運動明星喺做咗媽咪之後成績更加耀眼，佢哋全部都成為咗傳媒嘅焦點，趁住今日母親節，特別精挑細選咗幾位最出位嘅SUPERMOM，向佢哋致敬！
要數體壇出位阿媽，「大帝媽」哥莉亞認第二，肯定冇人敢認第一！事關自從勒邦占士成為一線球星之後，哥莉亞亦跟住成名，不過係臭名遠播，醉駕、姊弟戀、打人鬧事乜都齊，搞到占士都要「掟」阿媽返鄉下，以免佢再搞事。但無論哥莉亞如何胡鬧，「大帝」都會原諒佢，因為冇哥莉亞嘅堅持，就冇今天嘅占士。
占士在接受傳媒訪問中話：「佢唔單止係我阿媽，亦係我老竇，佢係我嘅一切，我知道做阿媽係世界上最難嘅事，比起做專業運動員、總統更難，要讚頌媽媽，一日又點夠。」
「大帝媽」哥莉亞的負面新聞始於○六年佢醉駕被捕，在拘留期間不斷反抗，還破口大罵及踢警車玻璃而惹人注目。到○八年季後賽，哥莉亞就因為「大帝」在場上被侵犯而大吵大鬧，當時連占士自己都睇唔過眼，叫阿媽收聲坐低，結果搞到兩母子當眾對罵，大出洋相。
不過最令勒邦占士傷心嘅，應該是上季盛傳「大帝媽」戀上其隊友韋斯，據悉占士實在接受唔到隊友成為佢嘅「新爸爸」，加上母親被傳媒批評到體無完膚，令占士大感羞愧。今年「大帝媽」又再出事，於酒店玩樂後懷疑飲醉酒怒打代客泊車員，結果被當地警方拘捕，而占士亦立即派人保釋哥莉亞，並四出搵朋友幫手擺平事件。
雖然麻煩事一單接一單，但占士都會原諒阿媽，皆因「大帝」親父喺哥莉亞懷孕後就將佢拋棄，若非當時僅得十六歲的哥莉亞堅持誕下占士，並將佢撫養成人，球迷今天好可能已經睇唔到「大帝」嘅光芒。所以占士曾經承諾，今生今世都會好愛錫哥莉亞。
今日母親節，喺「大帝」心目中除咗哥莉亞外，亦要多謝另一個媽咪，就是為他生咗兩個仔嘅女友：「佢同兩個仔對我好重要，我完全明白母親對一個孩子嘅重要性，所以我每日都珍惜同佢哋一齊嘅時間。」