【本報綜合報道】由於馬刺出局，湖人又失準，所以今季季後賽表現穩定嘅熱火，已被視為奪標頂頭大熱！不過熱火聽朝將遇上今季最大難關，在次圈Game3作客塞爾特人。熱火近十次作客塞爾特人輸晒，而對上一次在ＴＤ花園贏波，已經要數到四年前。（now 635及廣東體育周日早上８時直播）
自從熱火在○七年由奧尼爾領軍作客擊敗塞爾特人後，熱火在往後就從未在ＴＤ花園中嘗到勝利滋味，七場常規賽及三場季後賽全部敗興而回。面對如此劣績，韋迪賽前就表示：「要忘記領先形勢，當○比○咁打！」
至於已落後○比二嘅「綠軍」塞爾特人，賽前就收到好消息，教練李華士透露老將奧尼爾將會復出倒戈，但預計上陣時間唔會太多。此外，有傷在身嘅皮雅斯、朗度及雷阿倫，經過連日休息後，賽前亦有參與操練，估計無礙上陣，不過熱火教練史普斯達就不滿第三戰與第二戰相隔了三日才比賽，對着晒火嘅熱火不利。