眾所周知，小牛班主古班係全聯盟中最肯使錢嘅老細，多年來投放嘅資金達天文數字，可惜依然未能嘗到捧盃滋味。好多人認為小牛未能奪標係因為球會經理冇眼光，唔似熱火嘅萊利咁能夠為球隊組織「超級三巨頭」，以致整體實力根本未達到爭標水平。
不過，經過季後賽次圈兩度擊敗湖人後，阿裕就認為小牛雖然冇最好嘅球員，但卻有最適合球隊打法嘅良將。就好似中鋒贊特拿同小前鋒馬利安，雖然二人都唔係聯盟中嘅一線球員，但佢哋肯走位、肯移動，自然有空間去接應領袖傑特嘅傳送，而且防守又夠爛打，大大減輕魯域斯基嘅負擔，令後者可以在今個系列賽中大爆發。
當然，小牛能夠意外地領先場數二比○，某程度亦因為球隊在今個對碰中學識「扮豬食老虎」，令湖人有所鬆懈，就如早前嘅灰熊，都係先示人以弱，然後嚇你一驚，淘汰馬刺出局。
有線ＮＢＡ評述員蔡芳裕