再負小牛主場2連敗 湖人衞冕凍過水
衞冕冠軍湖人形勢告急，昨日在西岸次圈第二戰再度主場失利，以81比93不敵小牛，總場數落後至0比2！在湖人歷史上，此前曾試過23次在季後賽落後場數0比2，當中僅能2次翻盤出線，成功率不足9%，衞冕之路極度黯淡。至於常規賽一哥公牛則能撥亂反正，同日以86比73擊敗鷹隊，場數扳成1比1。
落後0:2翻盤率不足9%
湖人昨日可以話打出今季最差一仗，加素仍未能阻擋魯域斯基強攻，後者全場起手16次入9球，獲得24分及7個籃板，反觀加素僅得13分，高下立見，難怪湖人球迷在比賽時都不滿加素表現而報以噓聲。內線軟弱，外投亦失準，湖人全場合共在3分線上起手多達20次，但可惜僅入兩球，寫下了球隊在季後賽史上，三分球出手次數達20次嘅命中率新低。
此外，領袖高比拜仁亦失去了挽救球賽嘅能力，雖然佢今場攻入23分，表現未算太差，但在最關鍵嘅第4節中，高比仔就只有5分進帳，眼白白睇住比數被小牛拋離亦無能為力。
公牛擒「鷹」扳平場數
事實上，湖人輸波後已被推至懸崖邊，事關湖人在歷史上曾有23次落後0比2局勢，但能夠成功翻盤就只有69年反勝勇士，以及04年反勝馬刺，翻盤率不足9%。而04年一次係湖人先作客，所以在主場以0比2落後翻盤，其實就僅得42年前嗰次。再者，湖人今場有阿堤斯在尾段粗野拉低巴利亞，有可能被罰停賽，可謂雪上加霜。
另一邊廂，公牛昨日打出滴水不漏嘅防守，成功封殺上場瘋狂飆分嘅祖莊遜，結果以86比73贏波，總場數追成1比1。
本報綜合報道