灰熊掃雷勢不可當
上周六先淘汰完「一哥」馬刺出局嘅灰熊，休息一日後，昨日凌晨作客以114比101擊敗雷霆，不但在場數先拔頭籌，更取得球會史上首場季後賽次圈勝仗。兩大內線球員蘭度夫及馬克加素表現搶鏡，再做贏波英雄。至於東岸另一場準決賽熱火則在爭議聲中，以99比90擊退塞爾特人。
蘭度夫同馬克加素今場都取得「雙雙」，蘭度夫更取得全場最高34分，而馬克加素則貢獻20分及13個籃板球。今場雷霆輸波關鍵係失誤太多，全場達18次，較灰熊多11次，另除杜蘭特外，其他球員全部交唔到貨。
蘭度夫表示：「以往我哋得唔到應有嘅尊重，但我哋愈打愈好，依家信心爆棚，狀態處於巔峰，我有信心可擊敗任何球隊。」杜蘭特亦話輸得心服口服：「我哋好似阻止唔到蘭度夫得分咁，唯一可做嘅事就係令佢射波時冇咁輕鬆。」
熱火爭議聲中挫綠軍
同日熱火亦以99比90贏出次圈首戰，上季季後賽均被綠軍淘汰出局嘅勒邦占士同韋迪都顯示出復仇鬥心，韋迪弗到漏轟入38分，而占士則取得22分、6籃板球同5助攻嘅全面數據。今場大戰火藥味濃，皮雅斯就因為與韋迪衝突而被驅逐離場，但大部分美國媒體都質疑球證判決，認為球證喺判罰技犯方面太嚴苛，間接改變了戰局。
不過球證賽後解釋指係皮雅斯爆粗鬧韋迪先將佢逐離場。另方面，歷史上第3位首季執教就取得「60勝」嘅公牛教練泰保杜，獲選為今季常規賽最佳教練。
本報綜合報道