季後賽次圈賽事即將展開，最具話題性嘅對碰當然係坐擁「三巨頭」嘅熱火，硬撼有「四天王」嘅塞爾特人。阿裕近排同朋友談論呢個系列賽，發覺年紀較細，好似我嘅學生，又或者二十歲出頭嘅隊友，大多較睇好熱火能夠殺入東岸決賽。相反「三字頭」嘅朋友，就認為塞爾特人先係勝利者。
由於阿裕都係一名老將，所以我今次都撐塞爾特人。其實綠軍今季嘅陣容的確非常鼎盛，尤其係下半季獲得謝夫格連、卡斯迪及梅菲加盟後，板櫈深度大增，要知季後賽係一個漫長戰役，縱然塞爾特人正選不及「熱火三巨頭」如日方中，但板櫈力量就一定壓倒熱火。
再者，今季熱火最大問題係面對同級對手時經常失準，就好似在常規賽四對塞爾特人輸三場，另外亦遭東岸一哥公牛橫掃，個人認為多少因為熱火球員心理質素較低，在關鍵時刻往往唔能夠發揮應有水平，成為輸波主因。
有線ＮＢＡ評述員蔡芳裕