魔術首圈出局引發後遺症
前兩季都能打入東岸決賽嘅魔術，今季未能延續佳績，昨日在生死戰中以81比84不敵鷹隊，總成績輸2比4，宣布提早畢業，亦係今季季後賽首支種子排名較高嘅球隊在首圈遭到淘汰。魔術再一次行人止步，間接增加了挽留領袖杜域侯活嘅難度，估計「魔獸」大有可能倣效「甜瓜」安東尼咁另覓新東家。
大牌球星叛變成風
自從雲根迪接手執教之後，魔術近年已躍升為東岸強隊，只可惜今季賭博性嘅交易明顯「搏輸咗」，亞連拿斯、積遜李察遜及陶告魯等來投後大走下坡，結果魔術不但在常規賽戰績下滑，季後賽更自07年後首次在首圈行人止步。雖然杜域侯活在出局後，表態願意留隊，但事實會否如此，的確難講！事關自「大帝」勒邦占士「叛變」離開騎士後，就帶起咗大牌球星「唔續約」嘅潮流，今季鬧得最大嘅當然係「甜瓜」安東尼，至於基斯保羅及杜域侯活等明星級球員，就盛傳會倣效占士，跳出合同以自由身離隊。早前有指「魔獸」杜域侯活會行「師兄」奧尼爾舊路，打埋下季轉投湖人，爭取夢寐以求嘅冠軍指環，因此魔術呢次咁早出局，已為未來種下禍根。
湖人晉級將遇小牛
同日賽事，衞冕冠軍湖人以98比80輕取黃蜂，而小牛則以103比96擊敗拓荒者，兩軍都以總成績4比2淘汰對手，雙方晉級後會在次圈碰頭。係兩軍近23年來首次在季後賽中對碰，由於小牛班主古班同湖人教練積遜一向有牙齒印，預期賽事火藥味會相當濃厚。
本報綜合報道