比立斯受傷缺陣，史杜迪米亞「紮住上」，總場數落後0比3嘅紐約人，繼續靠「甜瓜」安東尼單天保至尊。雖然「甜瓜」攻入全場最高32分，但塞爾特人除朗度交出12次助攻外，34歲老將加納特更大放光芒，貢獻26分及10個籃板，協助球隊大勝，自92年後首次創下季後賽總場數橫掃4比0嘅佳績。
史碧奇李叫紐約人主席下台
季中傾家蕩產送走半隊主力換來比立斯及安東尼嘅紐約人，事隔7年再殺入季後賽，但首圈即告Game Over，紐約媒體估計教練迪安東尼勢被炒，名導演兼紐約人死忠粉絲史碧奇李（Spike Lee）就透過Twitter喪轟紐約人主席華殊：「我認為華殊應引咎辭職，佢搞到紐約人嘅陣容千瘡百孔。」