蔣世豪離世，整個體育界都好哀傷，因為「豪豬」唔單止好波，私底下都係一個好人，同唔少傳媒關係好好，波男心情仍然好沉重。
「豪豬」嘅離開，再一次顯示出，政府對於運動員照顧不足，一個曾經代表香港南征北伐十二年嘅球員，喺青年軍時代已經揚名，但最終落得如此下場，敢問政府對呢啲曾經為香港立下汗馬功勞嘅運動員做過啲乜？仲口口聲聲話支持香港運動員？
港府只識得好大喜功，早前提出要申辦2023年亞運會，但就忽略咗體育運動最基本嘅要素──運動員。不論係對運動員嘅訓練、生活、退休保障，全部都冇專門計劃，威就識得攞，點樣去統籌一個全面嘅體育政策，完全毫無頭緒。
外國球員好多退休後都喺番球會撈番一官半職，因為人哋球會賺到錢，香港球會成日要蝕錢經營，正正係因為政府政策問題，令到香港足球成日好似吊鹽水咁殘存落去，「鳳凰計劃」冇錯係一個好開始，但希望港府唔單止關注宏觀嘅發展，微觀嘅運動員保障先至係最基本需要。
如果做運動員搵朝唔得晚，仲點樣吸引新血加入，邊度有阿爸阿媽肯畀仔女去捱完苦然後得唔到應得嘅回報及保障，一日搞唔好呢樣嘢，一日香港都唔使諗搞乜嘢大型運動會，盞丟架咋！
波男