萊爾發憤幫拓荒者劏牛

本應係拓荒者核心嘅萊爾，自從膝蓋傷愈後被貶為後備，上陣時間亦大幅減少，搞到呢位星級球員忍唔住公開向球隊抱怨。不過上陣時間多少，始終都係由教練話事，所以萊爾尋日開賽前已為事件作出道歉，仲話唔會再為上陣時間而發牢騷。

巴克利賽前短訊點醒佢

所謂知錯能改，「惡漢」巴克利亦力撐呢位肯改過嘅後生仔，賽前就向萊爾發出短訊，鼓勵佢要抬起頭做人，想法要正面一點！結果萊爾亦被名宿點醒，今場後備上陣成為一路奇兵，出場24分鐘就攻入16分及交出4次助攻。此外，艾迪列治、安祖米拿及馬菲士都有上佳演出，均能攻入16分或以上，其中馬菲士就射入全隊最高25分，三分球6射4中，成為贏波最大功臣。萊爾賽後就多謝巴克利及家人嘅支持。

公牛熱火諗定點打次圈

不過，同日其餘兩場賽事，排名較低嘅球隊就冇咁好彩，溜馬以84比88不敵公牛，76人就以94比100輸畀熱火。溜馬同76人現時在總成績已大幅落後0比3，由於NBA史上從未有球隊能夠在落後0比3下出線，睇怕東岸一、二哥公牛及熱火都可以提早部署下圈賽事！

另外，NBA正式公布木狼前鋒路夫以400分獲選為最佳進步球員，第二及第三位分別係獲得157分嘅拓荒者前鋒艾迪列治，以及獲得124分嘅勇士前鋒杜利胡禮。