湖人捕蜂扳平場數
首戰落筆打三更嘅衞冕冠軍湖人，昨日終在季後賽開齋，以87比78擊敗黃蜂，總成績追成1比1。不過「紫金兵團」今場並非靠「孖寶」高比拜仁及加素贏波，兩大主將嚴重失準下，幸得「三綠葉」拜林、阿堤斯及剛奪最佳第6人嘅奧當交到貨，挺身而出為球隊止血。
湖人上場爆大冷不敵黃蜂，賽前預料兩大領袖高比拜仁與加素必定會來一個大爆發挽回面子。殊不知加素延續「軟蛋」本色，10次起手僅中2球，全場更只獲8分。至於「戰神」高比仔亦唔好得去邊，今場受制於前隊友阿利沙嘅嚴密防守，僅能為湖人貢獻11分而已，寫下近7年季後賽生涯得分新低，高比仔上一次攞11分咁羞家，已經要數番到04年。
木狼路夫奪最佳進步獎
雖然兩大主將啞火，但湖人出名人強馬壯，中鋒拜林與奧當今場表現勇猛，拜林交出「雙雙」嘅17分及11個籃板，而奧當則貢獻16分同7個籃板球，兩人合力支配內線。而「惡人」阿堤斯在攻守上亦有優異演出，攻入15分之餘，亦有2次搶截及2次封阻。另邊廂西岸一哥亦成功翻身，馬刺第2戰有真路比利復出攻入全隊最高17分之下，以93比87擊敗灰熊，總場數同樣追成1比1。不過真路比利賽後則透露仍未重拾佳態：「我要戴上護肘比賽，多少影響了發揮，而且剛剛傷愈，我希望下場會有更好表現。」
另方面，消息指木狼今日將會為星級前鋒路夫召開記者會，公布佢奪得今季常規賽最佳進步球員獎。路夫今季曾驚人地創下連續53場「雙雙」紀錄，並成為常規賽嘅「籃板王」，又首度入選明星賽，攞進步獎當之無愧。本報綜合報道
戰果放送
雷霆 106:89 金塊
馬刺 93:87 灰熊
湖人 87:78 黃蜂
註：前者主場