話咁快就兩年，耗資2.5億港元重建嘅旺角場，重建工程搞得七七八八，下季可以重開踢甲組波，不過波總同甲組會對於球場使用分配似乎仲未有共識。記得兩年前旺角場封場重建，波總乘勢推行主客制，港甲兩年來走遍港九新界多個地區場地，但效果欠佳，最主要問題係地區場原設計只作文娛用途，根本唔適合搞職業賽事。
港甲推行主客制仲有另一個問題，就係兩年來各支「主隊」其實只係掛名性質，除大埔、屯門同元朗與地區有所聯繫，其餘各隊都唔喺地區落腳，而「主隊」並無「主場」嘅使用權，球隊根本冇「主場之利」，又如何談得上主客制？
旺角場來季重開，主客制亦完成「歷史任務」，各隊毋須勉強同地區打交道，餘下嘅問題就係各隊點樣分配旺角場嘅使用權。
有網友轉數快，提議用聯賽成績去決定旺角場使用權，例如聯賽前四名球隊自動取得來季「旺角場席位」，呢個建議相當唔錯，令聯賽競爭性擴大，以後除咗爭冠軍，「旺角場席位」都勢必爭崩頭，再發展落去，成個聯賽都會好睇咗，水平亦會提高。
波男