安東尼大口氣有得追
「甜瓜」安東尼昨施展渾身解數，轟入42分及17個籃板，寫下多項季後賽紀錄，但紐約人喺重要關頭錯失良機，最終以93比96作客不敵「綠軍」塞爾特人，東岸首圈7場4勝制落後至0比2，令紐約人季後賽不勝紀錄增至3,642日，安東尼賽後好大口氣話「綠軍」領先兩場冇乜大不了，紐約人只係輸自己，返到主場將進行絕地反擊！
尋日係「MJ63」紀念日，波神米高佐敦喺25年前，於季後賽首輪對塞爾特人攞咗63分，而今仗安東尼亦有「神級」演出，取得42分、17個籃板同6次助攻嘅超強數據，不但平咗自己季後賽得分紀錄，17個籃板亦刷新咗季後賽新高，NBA自1991年以來，從未有球員可以喺季後賽造出「42+17+6」嘅數據。
「42+17+6」神級演出
紐約人今仗輸波同首回合如出一轍，喺比賽末段紐約人都曾經領先，而且有贏波嘅機會，但球員關鍵時刻發軟蹄，加上安東尼每次接波，都被敵方最少兩位球員夾擊，令佢被迫將波交畀其他隊友，可惜隊友唔爭氣，令紐約人以3分之差落敗。
紐約人今仗輸波另一原因，係史杜迪米亞上半場末段因傷退下火線，下半場一直喺更衣室接受治療，令紐約人最後關頭少咗個信得過嘅得分球員。紐約人對上一次季後賽贏波已經係2001年4月，安東尼誓言返回主場一定要贏波：「我哋兩場波都打得唔錯，而且好有機會贏，最終贏唔到都冇辦法，塞爾特人主場贏兩場冇乜特別，只要我哋返回主場做同一件事，就可拉成均勢。」
本報綜合報道