周三凌晨英超獨腳戲，曼聯作客0比0打和紐卡素，未能進一步拉開榜首優勢。今場雙方各有機會獲判十二碼，但球證兩次都網開一面，難怪一向批評多多嘅曼聯領隊費格遜賽後都冇過激反應，仲叫球隊唔好淨係掛住阿仙奴，還要小心逐步逼近嘅車路士。
曼聯中場路爾斯安達臣下半場初段禁區內踢跌盧雲克蘭斯，而查維亞靴南迪斯則喺完場前被紐卡素守將丹尼森遜侵犯，球證普拔兩次都冇畀十二碼，而且仲認為「小豌豆」插水畀咗面黃牌佢，結果兩軍互無紀錄。費格遜就力撐愛將：「呢球唔罰12碼？OK，我接受！但仲罰黃牌就好似侮辱緊佢，『小豌豆』一向唔係喜歡做戲及插水嘅球員。」