公牛熱火2:0帶出
季後賽西岸一、二哥首圈出師不利，但東岸頭兩號種子就順風順水！常規賽冠軍公牛尋日續有領袖戴歷羅斯爆發，豪取36分下以96比90氣走溜馬，在7場4勝制領先至2比0。至於二哥熱火贏得更加輕鬆，韋迪帶病上陣交到貨，「三巨頭」合共攻入64分，協助熱火以94比73大勝76人，同樣兩連勝。
首場被「老八」溜馬逼得抖不過氣嘅公牛，今場亦唔見得輕鬆，幸好戰情同首戰相近，公牛在第四節從後趕上反勝，而溜馬則再一次因最後階段失準而保唔住領先優勢。戴歷羅斯銳不可當，個人轟入36分兼貢獻8個籃板及6次助攻，溜馬對住羅斯仔可謂冇晒符！此外，溜馬兩位主將格蘭加及希斯保治今場都略為失準，其中希斯保治12次起手僅中2球得6分，內線都輸埋畀對手。
韋迪帶病上陣一樣勁
另邊廂，熱火贏得更為輕鬆，韋迪賽前受到偏頭痛困擾，幸帶病上陣無礙發揮，貢獻14分及6個籃板，而保殊就攻入21分。不過全場最Sharp嘅依然係勒邦占士，「大帝」今場交出29分、7個籃板及6次助攻，帶領熱火由頭帶到尾大勝76人21分之多，算係今季季後賽打得最輕鬆嘅球隊。熱火現時在場數領先至2比0，出線機會可謂高唱入雲，因為76人在歷史上曾10次在7場4勝制嘅季後賽落後0比2，但就冇一次能夠反勝晉級。
本報綜合報道