奧高查樂做夜場大亨
曾効力保頓、巴黎聖日耳門及費倫巴治嘅尼日利亞國腳奧高查，原來掛靴後喺祖家從商，開咗幾間餐廳、酒吧同埋夜總會，成為尼日利亞夜場大亨，據講生意仲唔錯添！
今屆歐聯睇好巴塞
奧高查退休後喺尼日利亞開咗唔少舖頭，其中一間酒吧「Number 10」，係以佢球員時代穿着嘅球衣號碼命名。奧高查話：「我冇蘇拿咁好彩，掛靴後有得做教練，依家又可以享受人生，我喺祖家尼日利亞開咗幾間餐廳、酒吧同夜總會，託賴生意唔錯，我好享受依家嘅生活。」
足迹遍布全球嘅奧高查，先後喺英格蘭、法國、德國、土耳其、中東搵食，不過佢話最鍾意都係英國，因為家人習慣嗰邊嘅生活，好快就安頓落嚟。問奧高查今屆歐聯睇好邊隊，佢話睇好巴塞隆拿，因為巴塞踢出悅目嘅足球，最有機會贏得錦標，至於自己最難忘嘅歐聯戰役，就係九六年踢費倫巴治時，作客擊敗曼聯一比○，能夠喺奧脫福擊敗曼聯，果然係一世難忘！