蘇拿無悔同阿布擦身而過

歐洲聯賽冠軍盃獎盃嘅「大耳朵盃」又嚟咗香港，贊助商仲請咗意大利名將蘇拿同前尼日利亞國腳奧高查做嘉賓，尋晚更喺港島舉行電車巡遊添，而蘇、高兩人更會喺今日中午十二時亮相觀塘apm商場，同「大耳朵盃」一齊出席活動，想一睹兩位球星嘅風采，記得去捧場喇！

車路士自阿布拉莫域入主後，收購咗唔少世界級球星，但喺車路士球迷心目中，唔屬於「阿布時代」嘅蘇拿，地位卻最崇高，難怪佢被選為車路士史上最佳球員！尋日蘇拿接受本集團獨家訪問話無悔當日喺阿布入主前離開車路士，因為佢喺車路士有美好回憶，包括九八年歐洲盃賽冠軍盃決賽，對史特加射入致勝一球！

蘇拿○三年離開車路士加盟卡利亞里，冇幾耐阿布拉莫域就入主車路士。阿布為咗力邀蘇拿回巢，不惜豪氣到要買起卡利亞里成間球會，可惜蘇拿依然不為所動。蘇拿話：「因為薩丁島係我家鄉，我想喺退休前返回意大利踢波。」

費蘭度托利斯加盟車路士以來，踢咗十一場聯賽及盃賽仲未開齋，蘇拿對此有一番見解：「佢以咁高轉會費由利物浦加盟車路士，但踢咗咁耐都未能取得入球，主要原因係壓力太大，但佢始終係一個有質素嘅球員。」