湖人贏馬刺拜林重創
湖人為爭2號種子付上沉重代價！雖然「紫金兵團」昨日成功止血，以102比93擊敗西岸一哥馬刺，終止5連敗頹勢，但中鋒拜林在比賽途中傷出，霎時間令湖人衞冕之旅蒙上重大陰影。拜林將在今朝進行磁力共振檢驗，屆時至知道傷勢有幾嚴重。
傷勢未明或提早收咧
賽前連輸5仗嘅湖人，若然在餘下兩場常規賽再有閃失，好可能會跌落西岸第4位，所以「紫金兵團」今場爭勝心非常強烈。相反作客嘅馬刺因為已鎖定西岸冠軍，「3巨頭」柏加、鄧肯及真路比利全部獲掛免戰牌，實力自然難與湖人抗衡，結果湖人憑高比拜仁攻入27分，另加素亦交出「雙雙」嘅17分及17個籃板球，最後以102比93氣走馬刺。
雖然湖人贏波後重返西岸第2位置，但「容易受傷的男人」拜林在第2節時踩中馬刺中鋒貝理雅腳面跣倒受傷，僅打13分鐘就要一拐一拐提早步離球場。賽後有消息指拜林因跣倒時拉傷膝蓋，常規賽煞科戰肯定無法披甲，並會喺今早接受磁力共振檢查傷患，如拜林不幸收咧缺席季後賽，勢必影響湖人爭取蟬聯總冠軍的機會。
公牛力爭常規賽冠軍
另一邊廂正追逐常規賽冠軍嘅公牛續響勝鼓，憑戴歷羅斯攻入26分，公牛以103比90擊敗紐約人，終止對手7連勝。公牛現時戰績與馬刺同為61勝20負，兩軍仍須在煞科日努力，力爭常規賽冠軍寶座。
本報綜合報道